Header image
Text background bars
log

Nellim-Keväjärven alueen kyläkokous

Tän teeʹkst lie rajjâm Pirita Näkkäläjärvi da Sara Wesslin Yle sääʹmođđâz vääras. Säämas tõn lij jåårǥlõttâm Terhi Harju.

Njeäʹllem-Keväjääuʹr sääʹmsuåvtõʹsse vaʹlljeeš Harju, Feodoroff, Määttä da Jefremoff

Vuõssmõs Njeäʹllem-Keväjääuʹr vuuʹd saaʹmi siidsååbbar såbbrõʹššeš pâʹsspeeiʹv Njeäʹllemest. Såbbrest vaʹlljeeš vuuʹd ođđ sääʹmsuåvtõʹsse Tero Harju, Vladimir Feodoroff, Helena Määttä da Simo Jefremoff. Vt. saaʹmi ouddooumaž Tanja Sanila jååʹđtam såbbrest leʹjje mieʹldd 12 oummu.

Sääʹmsuåvtõõzz 2015-2017
Čeʹvetjääuʹr vuuʹd sääʹmsuåvtõs
Veikko Feodoroff
Tapio Kiviniemi
Sirkka Hakkola
Heini Wessli
Vääʹrrvuässla: Tuomas Semenoff da Hanna-Maaria Kiprianoff.

Keväjääuʹr-Njeäʹllem vuuʹd sääʹmsuåvtõs
Vladimir Feodoroff
Tero Harju
Helena Määttä
Simo Jefremoff
Vääʹrrvuässla: Mari Lappalainen da Maija-Liisa Raasakka

Tän vaalpââi vuõssmõs Njeäʹllem-Keväjääuʹr vuuʹd saaʹmi siidsååbbar såbbrõʹššeš pâʹsspeeiʹv Njeäʹllem Erähotellist.
Veeʹrjest tuåimmjeei saaʹmi ouddooumaž Tanja Sanila jååʹđti ååʹn nuuʹbb vuâra siidsåbbar.
Pääiʹǩ âʹlnn leʹjje 12 ooumžed, ko Čeʹvetjääuʹr siidsåbbrest vueʹssmannu aalǥâst leʹjje 21 ooumžed.
Siidsååbbar vaʹlljii õõutmiõʹlle Njeäʹllem-Keväjääuʹr vuuʹd sääʹmsuåvtõõzz eeʹjjid 2015-2017. Vuässlain vaʹlljeeš Njeäʹllmest Simo Jefremoff da Helena Määttä, de Keväjääuʹrest Tero Harju da Vladimir Feodoroff. Vääʹrrvuässlain vaʹlljeeš Maija-Liisa Raasakka da Mari Lappalainen.
Njeäʹllem-Keväjääuʹr siidsåbbar aalǥâst pääiʹǩ âʹlnn leʹjje pâi kääuʹc ooumžed, leâʹša looppâst såbbra puõʹtte 12 siid ooumžed da sååbbar põõsti vaʹlljeed ođđ sääʹmsuåvtõõzz. Saaʹmi siidsåbbrest âʹlǧǧe leeʹd uuʹccmõsân lååi siidâst jälsteei säʹmmla leʹbe sij pieʹllkueiʹm, što tõt leʹčči mieʹrreemvääldlaž.

Tero Harju jurddi sääʹmsuåvtõõzz pirr

Njeäʹllem-Keväjääuʹr sääʹmsuåvtõõzz ođđ vuässlaž Tero Harju tuäivv, što Keväjääuʹr siid oummu jååʹđče jeänab såbbrin siʹjjid leʹčči pueʹrab teâđtumuš.
– Keväjääuʹr vuuʹd ǩiõččâmvueʹjjest leʹčči vääžnai, što siid oummu jååʹđče såbbrin aktiivjab. Tõt lij hueʹnn, ko ođđ puõlvvõk ij jeäʹl såbbrin ni vooʹps, ij-ǥa tieʹđ täi pirr, što mâiʹd täin šâdd. Leʹčči tuõđi šiõǥǥ, što oummu puäʹđče jeänab mieʹldd, Harju ceälkk.
Tero Harju vuârdd tõn še, što ouddooumaž reâuǥči vuässõõttmõõžž pueʹreem diõtt.
– Jeänab õõlǥči teâđted aaʹššin mediast. Tõt leʹčči muu miõlâst šiõǥǥ äʹšš.
Harju jiõčč jäälast Keväjääuʹrest. Täi koumm eeʹjj vääras suʹst lie miõlâst måtam vääžnai ääʹšš.
– Teâđast Njeäʹllem čuâǥǥas lij õhtt jõnn äʹšš da tõn pirr-i lij jiânnai mainstum juʹn ouddpeäʹlnn juõʹǩǩ õhttvuõđâst. Teʹl Keväjääuʹrest tõt lij hueʹnn, ko ij leäkku päiʹǩǩ, koʹst vuäitči norrõõttâd, siidpõrtt leʹbe mii-ne tõnnallšem. Jõs nåkam leʹčči, de toʹben še vuäitči såbbrõõššâd da tõnnalla vuäǯǯad keväjäuʹrrneeʹǩǩ pueʹtted såbbrid. Puk jie viižž kuuitâǥ vueʹlǧǧed Njeällma leʹbe Čeʹvetjäurra kuʹǩes maaʹtǩi diõtt.
– Keväjääuʹrest lie jiânnai päʹrnnpiârri da nuõrr oummu, tõt ođđ puõlvvõk, kååʹtt lij puättam tok. Ååskam, što vuäʹmm puõlvvõõǥǥ eeʹttǩeei tuäivvjeʹče še, što nuõrroummu vääʹldče vaʹsttõõzz täin aaʹššin.
Tero Harju kuuitâǥ jiõčč låʹppad leeʹd aktiivlaž.
– Põõrǥam leeʹd nuʹtt aktiivlaž ko pâi vuäitam da põõrǥam tuejjeed puk mâiʹd mon silttääm täi õhttsaž aaʹšši ouʹdde. Tõt lij vääžnai.

Ođđ ouddoummu lij šiõǥǥ miõlin

Veeʹrjest tuåimmjeei ouddooumaž Tanja Sanila Čeʹvetjääuʹrest låʹppad teâđted pueʹrab. Da son lij seämma miõlin Tero Harjuin Njeäʹllem-Keväjääuʹr vuuʹd aktiivʼvuõđâst.
– Leäm šiõǥǥ miõlin tääiʹben Njeäʹllmest da leäm älššai kuvddled, što mâiʹd oummu haaʹleče, što mâiʹd mon tän vuuʹdest äälǥčem viikkâd ooudâs. Siõmmna põõlam tõn, što õhttsažtuâi vuuʹd sääʹmsuåvtõõzzin iʹlla čuuʹt aktiivlaž, leâʹša põõrǥam reâuggad tõn ouʹdde, što suåvtõs moʹttjeʹči jeänab aktiivlaž, Sanila ceälkk.
Tanja Sanila vuäinn tõn še, što lij vääžnai kulstõõllâd vuuʹd oummid.
– Sååbbar lij tuõđi vääžnail! Tät lij nåkam päiʹǩǩ, koʹst vuäitt kaaunõõttâd oummivuiʹm da mainsted õõutsââʹjest aaʹšši pirr. Tuäivv mieʹldd vuäǯǯap aivv ođđ aaʹššid ǩiõttʼtõõllâmnalla. Ođđ Njeäʹllem-Keväjääuʹr vuuʹdi såbbrest viikkâp aaʹššid õõutsââʹjest ooudårra.
– Muʹnne kuâsttai, što oummu haaʹlee muttõõzz. Sij haaʹlee, što ääʹšš mâʹnne ooudårra. Jiõčč še tuäivam, što äälǥčep ǩiõččâd måtam aaʹššid šuurab perspektiivi čõõđ. Tuäivat, što rääuhast da naʹzvaanvuõđin viikkâp aaʹššid ooudårra.
Čeʹvetjääuʹr-Njauddâm da Njeäʹllem-Keväjääuʹr siidsåbbri mâŋŋa Tanja Sanila reäšš pannveerjlaž gååradsiidsåbbrid da Âʹvvlest še ouddoummu kuullâmpooddid.
– Täättam tieʹtted siõmmna jeeʹres Sääʹmjânnam saaʹmi vuäinalmid. Vuârdam, što sääʹm-meer oudd muʹnne ođđ jurddjid de ǩiõččâp, što mâiʹd tõin šâdd.
– Jiõččääʹššest muʹst lie määŋgnallšem jurddi, leâʹša mâŋŋlest tõn vuäinn, što mii tõin lij pueʹrmõs vaajtõsmäiʹnn. Kâʹl mon vuâlǥam tõʹst, što teâđtumuš âlgg tuåimmad še.

Kommentoi

Sähköpostiosoitettasi ei julkaista. Vaadittavissa kentissä merkkinä: *

*
*
WWW-sivut

 
Text background bars
Divider